冬瓜山補城地40年的簳仔店
文/游建峰口述(社會工作師),林憶秋台語文記錄
冬瓜山補城地火生叔(伯、公)个簳仔店,是真濟奇武荖、香員宅、補城地成長个「五、六、七、八年級生」成長个共同記憶,這間簳仔店是佇我度晬个時(1974年)開个,老爸原本是佮叔伯兄弟作伙佇南方澳附近整船討海,家母是經營這間簳仔店兼顧阮五个兄弟姐妹;只是家母佇1979年8月1日颱風天个透早,佇台九線予對向个車衝撞,當場不幸過往,家父賣掉漁船,以42歲个年紀接落簳仔店,從此佇庄仔內火生兄个簳仔店,一年擱一年煞成作火生叔、火生伯、火生公个簳仔店,一目「目聶」老爸經營簳仔店也近四十年了,遮成作通人知个重要地標,嘛是鄰里个資訊交流站;相對佇1990 年後開始出現个超級市場、連鎖便利商店,簳仔店个人情味總是予人勁肖念!
簳仔店會使予學生囡仔放學了後,作伙看布袋戲个好所在;
簳仔店會使是茨邊頭尾糾紛時,討論公共事務个協調所;
簳仔店會使是大人囡仔過年時,聚作伙採買年貨个團圓地;
簳仔店會使予人客免紮錢消費,先賒帳佇月底結帳;
簳仔店會使予人客坐佇櫃枱前,佮頭家拍抐涼、話仙;
簳仔店會使予人客今仔日訂貨,明天遮擱來領貨;
簳仔店改善了茨內經濟,綴三級貧戶到小康家庭;
簳仔店成就了老爸一生,綴單親父親到智慧長者;
簳仔店凝聚了兄弟姐妹,綴一人一路到逐家擱聚作伙;
簳仔店是我綴囡仔時到大漢个成長地;
簳仔店是我綴自卑到自信个培養所;
簳仔店是我綴驚駭到勇敢个磨練處;